Kua hoko e magaaho ke liu fai onoonoaga mo e hakahaka e tau fakaakoaga he Curriculum ha Niu Silani

Ko e magaaho nai, kua amanaki a mautolu ke liu fai kitekiteaga fakamakutu mo e hakahaka e tau fakaakoaga curriculum ke lata mae tau aoga, ke moua e holo tatai he tau fakaaogaaga bicultural, putoia oti e tau fanau, maama mitaki e tau fakaakoaga kua aoga, mahuiga mo e mukamuka ke fakaaoga.

Ko e onoonoaga nai to taute ia ke he lima (5) e tau-tau ti pihia foki ma e fenoga. To kumikumi atu foki a mautolu ke he falu a fakailoaaga mo e falu a tala mai he tau Takitaki Aoga, Tau Faiaoga, Tau Ako-mena, tau mamatua mo e tau magafaoa (whanau).

Ko e heigoa e kakano he liu onoono fakamakutu mo e hakahaka e tau fakaakoaga curriculum ke lata mae haau a tama?

  • Mokoina he haau a tama e haana a tupumaiaga, vagahau mo e haana a tau aga fakamotu
  • To kitia mitaki e tau fakaakoaga kua lata tonu he tama haau ke iloa, maama mo e foli ki ai he haana a moui fakaako
  • Maeke ia koe ke moua e maamaaga mo e mahino mitaki e holoaga he tau fakaakoaga he haau a tama mo e haana a tau amaamanakiaga i mua
  • Maeke he faioaga he haau a tama ke moua e tau lagomatai kua lata tonu ke lagomataiaki ke puhala e tau fakaakoaga ke he tau mena kua malolō mo e makaka e tama ki ai mo e haana a tau manako

Ko e ha ne taute pehē nai ai e mautolu?

Ke he tolu e tau tau kua mole ki tua, kua uiina e mautolu e tau mamatua, tau magafaoa mo e tau fanau fakaako ke talahau mai e tau tau manatu hagaao ia ke he tau fakaakoaga curriculum he tau aoga puhala ai he tau fonoaga mo e tau fakatutalaaga he Education Conversation mo e tau fakatutalaaga NCEA. Kua tahalau mai he tau tagata kua lata ke liu fai onoonoaga fakamakutu mo e liu ke hakahaka e tau fakaholoaga fakaakoa mo e kua lata ke putoia e tau mena tuga e:

  • Tau momoui tutupu hake, tau vagahau, tau aga fakamotu mo e moui oloaola he tau fanau
  • Tau fakaakoaga kua mua atu e mahuiga mo e aoga
  • Moua e mokoina ke he ua e vagahau (bicultural foundation) he motu nai ko Aotearoa
  • Putoia oti e tau fanau ke he tau fakaakoaga ke lata mae tau moui fakaako he tau fanau mo e tau fuata
  • Putoia tumau e tau mamatua ke he tau momoui fakaako he tau fanau mo e taute e tau puhala mitaki ke he tau fakatutalaaga mai he tau faiaoga hagaao ke he tau hokotaki he moui gahua mo e tau fakaakoaga he tama

Ko e heigoa e Curriculum Niu Silani (NZ Curriculum)?

Ko e Curriculum Niu Silani ko e tau fakatokatokaaga he tau fakaakoaga kua muitua mo e fakaako e tama haau ki ai ke he aoga. Lagomatai foki e tau faiaoga ke talaga ha lautolu a tau fakatokatokaaga gahua he tau aoga fakaako ke iloa foki e tau mena kua lata tonu he tama ke fakaako mo e foli ki ai he moui fakaako he tama. Kua fakaako he tau aoga oti i Niu Silani fakaaoga ai e vagahau Peritania. Fakaaoga he tau faiaoga e Curriculum Niu Silani mo e tau mena kua aoga lahi he tau matakavi he tau aoga ke pota auloa, putoia mo e talaga e tau fakapapahiaga fakaakoaga ke lata mae tau fanau.

  • Ua lā e tau veveheaga he national curriculum he tau aoga ikiiiki, tau aoga vahāloto mo e tau aoga tokoluga:
  • Ko e Curriculum Niu Silani ne kua fakaako he tau aoga ne fakaaoga e vagahau Peritania.
  • Ko e Te Marautanga o Aotearoa he tau aoga ne fakaaoga e vagahau Maori.

Ko e heigoa e tau hikihikiaga?

Ko e onoonoga nai mo e hakahaka he Curriculum Niu Silani to amanaki ke fai fakamaamaaga hokulo hagaao ia ke he tau mena kua lata tonu mo e mahuiga ke fakaako ki au ha tautolu a tau fanau, pihia foki mo e tau fakapapahiaga he tau fakaakoaga he tama. To moua he tau faiaoga e tau lagomatai kua lata tonu ke mautali ke lagomataiaki e tau fanau fakaako. Hoko mai e tau magaaho ke fakaoti mai e tama mo e tau fakaakoaga kua moua e tama e pulotu, iloilo, makaka mo e tau tufuga ke moua e ia e kautū ke he haana a tau amaamakiaga a anoiha.

Muitui ke he tau fakaholoaga nai, ha hā i ai foki e tau tohi hokotaki ke lata mae tama ke he haana a moui fakaako hagaao ia ke he tau veveheaga fakaako mo e foliaga haana kua hoko a ia ki ai, tau malolō, tau makaka mo e tau fakaakoaga kua lata ke fai lagomataiaga a ia ki ai.

Ke fakaholo ki mua e tau tauteaga nai, kua lata tonu he curriculum ke:

  • Lagomatai mo e omoi e tau aoga ke matutaki e mokoina he tau momoui tutupu hake, tau vagahau, tau aga fakamotu he tau fanau oti, ke iloa mo e maama he tama, ko ia kua putuoia ke he tau fakaholoaga fakaako tama.
  • Fakamaama fakamitaki e tau fakaakoaga kua mahuiga mo e lata tonu ke fakaako ki ai e tau fanau oti, ke moua e foliaga mitaki ki mua mo e kautū.
  • Ke moua e mukamuka mo e maama mitaki he tau faiaoga ke fakaaoga, maama mo e mahino mitaki ko e heigoa e tau matapatu fakaakoaga kua lata tonu he tau fanau ke iloa, maama mo e foli ki ai ke kautū.

Kua hoko e magaaho ke liu fai onoonoaga mo e hakahaka e tau fakaakoaga he Curriculum ha Niu Silani [PDF, 239 KB]

Last reviewed: Has this been useful? Give us your feedback